Ua iai nei i luma o le Faamasinoga Maualuga a Samoa se matāupu tau faamasinoga ua su ai e se tagata mai fafo le faalapotopotoga o le si’osi’omaga o le Pasefika le SPREP o loo i Vailima lea sa galue ai ma avea ma se tasi o faatonu.
O le faamutaina o le toe galue o lea tagata mai Egelani i Peletania e lea faalapotopotoga faavaomalo o loo avea Samoa ma ona nofoaga tutotonu, o le māfua’aga lea o le tagi e ala i se su.
Peita’i o loo iai se finauga faaletulafono ua faaulu e le faalapotopotoga o loo autū i le mau, e leai se malosi’aga faaletulafono o le faamasinoga a Samoa e su’esu’e ai lea su, ona o le faalapotopotoga e iai avanoa i aiaiga o tulafono faavaomalo e lē mafai ai ona molia i le faamasinoga.
O le su’esu’eina o lea finauga ua aapa ai le faalapotopotoga o le SPREP i se talosaga e taofia ai le su’esu’eina o le tagi poo se strike out motion lea o le a valaau i le aso 8 o le masina fou o Iuni e tuuina atu ai se tali a lē ua tagi i lea talosaga.
O lē sa galue i le faalapotopotoga ae ua faamuta lana auaunaga ma o ia foi lea ua tagi, o Maikali Williame Nawaqaliva.
O lana talosaga na finauina ai le tuuina atu e le faalapotopotoga o le SPREP o faamatalaga sa ia mana’omia e faamautū ai māfua’aga o le finauga faaletulafono a le faalapotopotoga, e taofi le su’esu’eina o lana su, ua teena e le Faamasinoga Maualuga.
