O aafiaga tau tupe i le faagaioia o le a’oga mo fanau e iai aafiaga tumau le Loto Taumafai i Vaitele ma māfua ai ona tapunia mo ni masina ma faaletonu le totogiina o faia’oga, o le lavea’i mai le malo ua mafai ai ona toe faaauau le a’oga a o tālia le tala faatatau autū o le tupe mo le tausaga faaletupe fou, lea ua faailoa e le Minisita o A’oga ma Aganuu i luga o upega tafa’ilagi, ua faataoto ai se fesoasoani tau tupe mo le Loto Taumafai faapea le a’oga o le Fiamalamalama o loo a’oa’oina ai foi fanau e iai aafiaga tumau.
A o tālia ia fuafuaga a le malo, o le Fono Faavae a le itumalo palota o Faleata 3 o loo iai le a’oga o le Loto Taumafai ua latou faia se foa’i e sefulu afe tālā mo le a’oga.
Ua faailoa i le upega tafa’ilagi a lea Fono Faavae ata o le ta’ita’ifono ma sui o le komiti sa feiloa’i ma le pulega o le Loto Taumafai ma tauaao iai lea fesoasoani tau tupe.
O lea a’oga sa faatupe i se polokalame fesoasoani mai Ausetalia peita’i o le tausaga na tea nei na feagai ai ma faaletonu ina ua taofia lea fesoasoani.
Ua faailoa e le Minisita o A’oga ma Aganuu i lana fesoota’iga i le api o foliga, e 200 afe ua pasia e le Kapeneta mo le tala o le tupe fou e tuuina atu mo a’oga o le Loto Taumafai ma le Fiamalamalama.
E faaopoopo lea i vaegatupe ta’i 110 afe tālā o loo maua e ia a’oga e lua mai le tufatufaga o le fesoasoani a le malo mo a’oga uma i le atunuu le One Government Grant.
