Ua mae’a atu polokalame sa sami ai le 50 tausaga o le faalapotopotoga o tusitala ma le ‘aufaasalalau a Samoa, ae ua faailoa i se pepa o faamatalaga le sauni ai o se tasi o faalapotopotoga, le Sosaiete a Loia i Samoa e faamanatu foi ma sami le atoaga o le latou foi iupeli auro poo le 50 tausaga.
Ua faailoa e le sosaiete, o le masina o Aokuso o le a faagasolo ai polokalame o lea faamoemoe tāua o loo tapena iai, ma ua iai le fuafuaga e tasi le vaiaso o le a faatino ai polokalame ua fuafua e faagasolo mo le limasefulu tausaga.
Ua faailoa i se lipoti o le vaiaso atoa foi lea o le a faataatia ese ai galuega uma tau faamasinoga ina ia avanoa Faamasino ma Loia e auai i polokalame ua fuafuaina.
O le faavaeina o le Sosaiete a Loia i Samoa na amata faavae ina ua pasia le tulafono i le tausaga e 1976 e faasino tonu i le faamalosia o tiute tauave o loia, ma aiaia ai foi i lea tulafono ta’iala ma faasino ala e faatonu folau ai le faatinoga o lea tomai a’oa’oina i lo tatou atunuu.
