I le limasefulutasi o tagata o loo molia i le solitulafono o le faalēmigao i le faamasinoga ona o le lē oo atu e molimau i le faamasinoga tau palota a Falealili 1, e to’atolu e le’i oo atu i le amata su’esu’eina o moliaga i le Aso Gafua ma ua poloa’ina ai tusi saisai e sa’ili ai e leoleo.
O le faatonuga a le faamasinoga ia sa’ili ia maua ma avatu i luma o le faamasinoga.
O le amata su’esu’eina o moliaga i le Aso Gafua e le’i faataunuuina ona o le loia o loo tula’i mo le to’a tolusefulu o tagata molia o loo i Niu Sila e faato’ā taunuu i le amataga o le vaiaso fou.
Ua faatulaga ai le Aso Lua a sau, le aso 26 o Me e faaauau ai taualumaga o lea matāupu tau faamasinoga.
O loo fautuaina e leai ni loia ina ia tapena a latou faamatalaga e faailoa atu ai māfua’aga sa lē oo atu ai e tusa o le poloa’iga a o faagasolo le su’esu’eina o le tagi tau palota a Falealili 1 lea ua mae’a ma ua iai le faai’uga.
O loo lu’iina lea faai’uga e le sui faipule o le itumalo lea o le a tagofia e le Faamasinoga o Talosaga pe iai sona malosiaga e su’esu’e ai.
O le valaauga muamua o moliaga o le solitulafono o le faalēmigao i le faamasinoga i le Aso Tofi ua mavae na faailoa ai e se tamā o ia ma lona to’alua o loo aofia ia i latou o loo molia, na māfua ona lē auai i le su’esu’eina o le tagi tau palota ona sa faalafi i la’ua e le F.A.S.T. le vaega faaupufai o le Faatuatua i le Atua Samoa ua Tasi.
