O Samoa ma isi atunuu laiti o le Pasefika o le a malupuipuia i se galuega tuufaatasi a auaunaga faaleoleo a lenei faaitulagi, o le a taulamua ai leoleo o malo o Ausetalia ma Niu Sila, i se taumafaiga e taofia le faaui mai i le Pasefika o nakoti poo fuālaau faasāina ma le faamoemoe e ave e faatau i maketi i Asia aemaise o Ausetalia ma Niu Sila.
O le mae’a o le fonotaga i Fiti sa auai se usugafono a Samoa e aofia ai le Sui Komesina o le Matāgaluega o Leoleo, Falepuipui ma le Toe Fuata’ina, ua faailoa ai e le komesina o leoleo o Ausetalia ia Krissy Barrett, o le a faatupe e leoleo mai lo latou atunuu ae fesoasoani iai leoleo o loo leoina tuaoi o Niu Sila se vaega su’esu’e i Colombia e sa’ilia ai ni mau i le faamoemoe e taofia le toe aumai o ni uta o nakoti ma afea atunuu o le Pasefika.
Talu mai Ianuari o le tausaga nei ua faamauina e tusa ma le 17 tone o fuālaau faasāina e fulisia lava i le cocaine na faaulufale i nisi o atunuu o le Pasefika ae faamoemoe e ave e faatau i maketi i Asia faapea Niu Sila ma Ausetalia.
O atugaluga ma popolega ua iai nei o le aafia o nisi o le ‘augalulue i le leoina o tuaoi o atunuu e aofia ai leoleo ma i latou o galulue i le vaega o le tiute i faiga faaālatua i le talia o ni tupe tetele mai ia i latou o faia fefaataua’iga o nakoti i le māfua’aga autū ia lē mafai ona iloa ma maua le feavea’i o fuālaau faasāina i le va o atunuu.
O le tausaga e 2024 sa faamauina ai le 4 tesimale 6 tone o fuālaau faasāina na faaui mai i le Pasefika.
