Ua toe foi e faaauau lana tautua i le Matāgaluega o Leoleo, Falepuipui ma le Toe Fuata’ina le ta’ita’i leoleo le susuga Nanai Vani Vai, ina ua mae’a su’esu’ega faalotoifale a le matāgaluega i tuua’iga o le liki e le malu o le malo o tapenaga o osofa’iga e sa’ilia ai fuālaau faasāina, e leai se faamaoniga o le iai o se aafiaga o le ta’ita’i leoleo.
O le taunuuga o ia su’esu’ega ma le fautuaga a le Sui Komesina e toe faafaigaluega na tuuina atu i le Loia Sili mo sana iloiloga ma faamaonia atili ai, e leai se faamaoniga o tuua’iga.
O le ta’ita’i leoleo ma se malu o le malo e umia le tulaga faaleoleo o le tā’ai lua na faamālōlō lē tumau ae faia su’esu’ega faalotoifale, peita’i na faamavae le leoleo tā’ai lua le susuga Luani e le’i mae’a ia su’esu’ega.
O Ianuari o le tausaga nei na faamālōlō lē tumau ai ia malu o le malo ina ua tuua’ia i le liki ai o tapenaga i se osofa’iga a leoleo sa sa’ilia ai fuālaau faasāina.
