O loo su’esu’eina i le vaiaso nei i le Faamasinoga Faaitumalo le tagi o moliaga o faiga solitulafono o faatosina na māfua mai i le palota tele o le tausaga ua mavae, o loo tuua’ia ai le faipule o A’ana Alofi 1 o loo tauaveina le tofi minisita o le Matāgaluega o Faamasinoga ma le Faafoeina o Matāupu Tau Faamasinoga, le tofa Fesola’i Apulu Tusiupu Tuigamala.
E lima moliaga o le faia o auala faaālatua ma o loo su’esu’eina o se matāupu tau faamasinoga e faaaogā ai aiaiga o le tulafono o soligatulafono, ma o loo finauina ia moliaga e se loia o loo galue i se ofisa loia tuma’oti le susuga Alex Su’a lea e ta’ua o le private prosecution.
I le su’esu’eina o mau e lagolago ai moliaga na faailoa e le molmau muamua ua sui lona mafaufau e lē fia faia sana molimau.
O le māfua’aga na ia faailoa i le faamasinoga ua mae’a ona teuteu tulaga sa mau eseese ai, ma ua lagona foi ua tatau ona tuu le avanoa i le tamalii ua filifilia e le itumalo e faaauau ai lona tofi.
Peita’i e ui ina faailoa e le molimau lea māfua’aga, ae sa faaauau pea ona faia lana molimau ma tali i fesili a le loia a le itu a leoleo, faapea fesili a le loia a lē ua molia.
Sa faailoa e le loia o loo finauina moliaga ni atugaluga a o le’i amata valaau molimau, ona ua oo atu ni faamatalaga ua faailoa ai se taumafaiga e taofi le oo atu o molimau a le itu tagi.
O loo iai le faamoemoe o le tama’ita’i faamasino o loo feagai ma le tauaveina o lea matāupu, le afioga Alalatoa Rosella Papalii e tatau ona aumai sana faai’uga i le Aso Faraile o le vaiaso nei.
O le Aso Lua o lenei vaiaso ua faaauau ai ona su’esu’e molimau a le itu ua tagi faasaga i le faipule o A’ana Alofi Numera 1.
