Ua tapena le itumalo palota o Safata 2 e momoli lo latou sui faipule le afioga Tuia Pu’a Fuatogi Letoa i le vaega faaupufai o le Faatuatua i le Atua Samoa ua Tasi.
O le Aso Faraile o le vaiaso nei e pei ona faailoa e le sui faipule i le upega tafa’ilagi a le Fono Faavae a Safata 2, o le a faatino ai lea fuafuaga i le 12 i le aoauli.
O le a feiloa’i le itumalo palota i le maota i Togamau i le Aso Tofi i le 10 i le taeao a o lumana’i le faamoemoe i le Aso Faraile 22 o le masina lenei o Me, ma e pei ona silafia ua mae’a ona faamavae ma talia foi e le ta’ita’i ma le patī faaupufai e puipuia aiā tatau a tagata le faamavaega a le sui faipule sa tauva ma manumalo i le fu’a a lea vaega faaupufai i le palota tele ia Aokuso o le tausaga ua mavae.
O le fonotaga a le Palemene i le vaiaso fou i le Aso Lua 26 o Me o le a faailoa ai e le Fofoga Fetalai le faai’uga a le faipule o Safata 2 ma faatino ai ma aiaiga o le tulafono o faigāpalota faapea tulafono tumau e faasino i le faagafua o le nofoa o se itumalo i le Palemene pe a fia avea ma sui o se isi patī faaupufai lea e toe faia ai le filifiliga mo se isi sui usufono e ala i se faigāpalota laitiiti.
