A o faagasolo le su’esu’eina o tagata e 53 sa lē usita’ia le poloa’iga e oo atu e molimau i le taimi na fofogaina ai mau o le tagi tau palota mai le itumalo palota o Falealili 1, o le amatalia o lea faamasinoga i le Aso Lua na faia ai le faai’uga e talia le māfua’aga na lē oo atu ai se tasi o molimau, ma ua faasa’oloto e aunoa ma le faamaonia o lona moliaga o le faalēmigao i le faamasinoga poo le contempt of court.
Na tuuina atu faamaumauga mai le falema’i faamamā toto e lagolago ai le māfua’aga o le lē oo atu o le tamā ona sa faia tonu lana togafitiga o le faamamā o lona toto i aso sa valaau ai le tagi tau palota mo le fofogaina o molimau.
O aso ia e pei ona faailoa e le itu a leoleo o le aso 8 ma le aso 17 o Tesema o le tausaga na te’a nei 2025.
I le talia ai e le faamasinoga o lea māfua’aga ma sa’oloto ai lē na molia, e to’alua molimau o ni tinā sa la faailoa na māfua ona lē oo atu e tusa o tusi samania, ona sa fetaui tonu le aso na valaau ai le tagi tau palota mo le fofogaina o molimau ae gasegase lona tuaa tinā ua 79 tausaga o le soifua.
Na faailoa e lē ua molia e leai se isi e nofo i lona tuaa, o le māfua’aga lea sa lē oo atu ai.
O le isi tinā o le māfua’aga sa ia lē usita’ia ai le poloa’iga e oo atu e molimau, ona o le aso tonu lea na tigāina ai i le mūmū na pa’ū i se tasi o ona aao poo lona vae.
Ua faatonuina le tinā e oo atu i le Aso Lulu lenei ma lona uso e faamaonia ai sa aafia lona aao i le mumu ma o lona uso foi lea sa la sailia se taulasea Samoa e fofō ai.
O le ulugalii sa faasalalau e le faamasinoga le tatau ona oo atu e faia a la molimau ina ua talia i se faai’uga a le faamasinoga le su’esu’eina o le tagi tau palota e faaaogā ai faamatalaga tautō a molimau, sa faailoa e le tamā o lona lē mautonu ma fesasia’i lona mafaufau na māfua ai ona ia faailoa muamua i le faamasinoga na māfua ona lē oo atu e fai a la molimau ma lona to’alua, ona sa faalafi la’ua e le F.A.S.T.
O lana faamatalaga ina ua tula’i i le Aso Lua na suia ai le māfua’aga, i le faapea mai o le tamā sa oo atu i le aso na faatonuina e tula’i ai peita’i na taunuu i le maota faamasino i le vaega pito i lalo o le maota, ae faailoa e nisi ua uma le faamasinoga.
O le faamatalaga foi lea a le tinā ina ua faia lana molimau.
Sa tuliloaina i le faamatalaga muamua a lona to’alua sa ta’ua ai le faalafi, ae sa tutulu le tinā ma ia faailoa i le faamasinoga o ia e fefe ae o mea uma sa faailoa e lona to’alua o le māfua’aga tonu lea.
Sa fesili faamasino pe la te le’i maua se faasalalauga sa sa’ilia ai i la’ua mo le oo atu e molimau.
O lana tali e leai se faasalalauga na o la maua.
O le aso 26 o Iuni o le a maua ai se faai’uga a le faamasinoga i faamatalaga e tusa o māfua’aga na lē oo atu ai molimau ua mae’a ona tutula’i, a o faagasolo ai pea ona faasolo atu isi o loo molia.
