O lagona faaalia o fanau a’oga i a’oga tulagalua, ma kolisi maualuluga sa valaaulia e auai i le tauvaga o solo, tala ma lauga e avea o se tasi o polokalame o lenei vaiaso o loo faatāua ai i Samoa le sa’olotoga o le ‘augalulue faatusitala ma faasalalau, na molimauina ai le maualuga o tapenaga a a’oga ta’itasi sa mafai ona auai.
O se avanoa lea sa faailoa ai e fanau o latou silafia i le tāua o lea galuega i le taulogologo o tagata i gaioiga ma faatinoga o pulegamalo, o pulega i totonu o ekalesia ma auaunaga eseese, ma tausisia ai pulega lelei.
Sa autū tapenaga o lea tauvaga i le matāfaioi o loo faatino e i latou o loo galulue i lea tomai ma lu’itau o feagai ma i latou aemaise o fautuaga ma tuualalo e faaleleia ai.
O le kolisi maualuga o Sagata Maria i Vaimoso na sola ma le manumalo i le vaega o lauga, tulaga 2 le kolisi o Avele, tulaga 3 le kolisi o Robert Louis Stevenson ae tulaga 4 na sola ma le kolisi o Samoa.
I le vaega o tusiga tala o le kolisi o Sagato Iosefo na maua le tulaga muamua ma le tulaga lua, ma le tauvaga o solo na manumalo le a’oga tulagalua o le Apia Primary, tulaga lua na maua e le Samoa Primary ae toe tulaga tolu ai le Apia Primary.
O faailoga tupe ma ipu faapea faailoga faapitoa ma faailoga faaopoopo sa maua e a’oga na mautulaga faapea isi a’oga sa auai i le tauvaga.
Ua iai le fuafuaga a le faalapotopotoga o tusitala ma le ‘aufaasalalau a Samoa o le tausaga fou o le a tapena se tauvaga mo a’oga i Upolu ma a’oga i Savaii i le faamoemoe ia faatupuina le lagona o fanau e auai auā o le lumana’i lea o le atunuu aemaise o ni fanau o le a galulue i lea tautua i le lumana’i.
