O taumafaiga e toe auli faamafolafola le lotoifale o le pulega o le Lakapi Samoa i le va o sui o le Komiti Faafoe o iai nei ma sui sa iai, ae ua faasee tuagalu, sa auai le Palemia ma le Sui Palemia ma nisi o Minsita o le Kapeneta e aofia ai ma le Minisita o le Matagaluega o Taaloga. O faasalalauga tuusao a le vaega faasalalau o le Talamua o loo molimauina ai le siisii o finagalo o nisi o sui o le Komiti Faafoe e aofia ai le Taitaifono le tofa, Namulauulu Sami Leota ma se tasi o tamalii sa avea ma sui o le Komiti Faafoe ae na famavae ini vaiaso talu ai nei.
O le tofa Namulauulu Sami Leota ma se sui o le komiti faafoe le afioga Faleomavaega Titimaea Tafua sa felafolafoa’i finagalo i se fetufaaiga ma le afioga Matafeo George Latu oe tamalii o loo i totonu o se itutino o loo tapenaina se isi Iuni Lakapi fou.
O mataupu ile lotoifale o le taaloga sa agai iai lea fetufaaiga, ao molimauina e le Palemia ma sui o le Kapeneta.
O finagalo i se fetufaaiga o lagona i le fono a sui o le komiti faafoe o le Lakapi Samoa ao molimauina e le Taitai o le Malo ma nisi o Minisita o le Kapeneta. Faaalia e se molimau faatuatuaina sa auai i lea feiloaiga ua avatu le finagalo o i latou o loo fuafua e faatu se isi Iuni lakapi ina ia faasee ese ma le Pulega o le taaloga lakapi ma le Komiti Faafoe i latou o loo iai tofi Faipule i le palemene faapea e sa avea ma faipule.
O le latou mau e le tatau ona toe iai ni tagata o aafia i polokiki i le pulega o le taaloga. O loo iai foi se manao ua tuuina atu i le Komiti Faafoe e tatau ona toe teuteu le faavae o le pulega o le lakapi i Samoa.
