Ua salalau mai le tele o lipoti mai le atunuu o Vietnam ua faailoa ai faamatalaga ma ata o alii talavou mai Samoa ua tuua’ia i le maliu o Lorenzo Lemalu Tovia o se sui o le kegi o le Coconut Cartel i Sini Ausetalia.
Ae i Samoa ua faagasolo su’esu’ega a leoleo e sa’ili pe iai ni sootaga o se tagata poo ni tagata i Samoa ia i la’ua ua tuua’ia.
Ua faailoa e le Sui Komesina o le Matāgaluega o Leoleo, Falepuipui ma le Toe Fuata’ina le susuga Leiataualesa Samuelu Afamasaga, o le isi o vaega tāua o ia su’esu’ega o le sa’ili po ua iai ni gaioiga i Samoa e taupulepule ai le faia o ni solitulafonoo i se isi atunuu poo organized crimes.
I le Aso Lua i le feiloa’iga ma le Sui Komesina na fesiligia ai e tusitala e faatatau i lea faalavelave, ma faailoa ai e Leiataualesa Samuelu Afamasaga, o loo aga’i foi su’esu’ega i tulaga tau femalagaa’iga pe sa faaaogā e ia alii talavou ni tusifolau tau tagatānuu Samoa.
O alii talavou o Joseph Vaa ma Steve Tofa e pei ona faailoa lautele i lipoti a televise mai Ausetalia o la suafa, na pu’eina e leoleo i le Aso Gafua i se nofoaga e latalata i le tuaoi o Vietnam ma le atunuu o Cambodia ma taofia ai mo su’esu’ega.
Ua salalau foi i luga o ia lipoti ta’utinoga ua faia e ia alii talavou i lo la faatino o le solitulafono a o molimauina e nisi o leoleo o le atunuu o Vietnam.
I Samoa nei, ua faailoa e le Sui Komesina o leoleo o le a faapena ona logo se feiloa’iga ma tusitala i se taunuuga o su’esu’ega ua faagasolo.
Mo le silafia o loo i Samoa le ofisa tutotonu o galuega faaleoleo i le Pasefika e māta’itūina faiga solitulafono faavaomalo ma ua galulue nei ma le matāgaluega o leoleo i le faia o ia su’esu’ega.
O lea ofisa tutotonu o loo iai uma sui o auaunaga faaleoleo mai atunuu eseese o le Pasefika.
