Ua i luga o upega tafa’ilagi se tusi a le tama’ita’i e iai lona tupu’aga Samoa, o Tulsi Gabbard, na tusia i le aso 22 o Me 2026, ua momoli aloa’ia atu ai i le Alii Peresetene o le malo tele o Amerika, Donald Trump, lana faamavaega mai lona tofiga o le U.S. Director of National Intelligence, e pei ona galue ai i le tasi ma le ‘afa tausaga na se’i mavae atu nei.
O loo ta’ua e le tama’ita’i o Gabbard le māfua’aga o lona faamavae mai lona tofiga, ona ua faamaonia le aafia o si ona alii poo lana tane o Abraham Williams i se gasegase tugā, o se ituaiga ogaoga o kanesa o ponaivi (extremely rare form of bone cancer), ma na ta’ua i lana tusi faamavae, ua filifili ai nei e faasee ese mai lona tofiga ina ia tuu atu atoa lana lagolagosua i si ona to’alua a o amata ona fesaga’ia le tele o lu’itau o le a iai a o faagasolo ona togafitiga.
O le aso 30 o Iuni 2026 o le a aloa’ia ai loa lana faamavaega, ae i le taimi nei o loo galue pea i lona tofiga a o taumafai ai e faatulaga i se faagasolog lelei le fesuia’iga o tofiga e pei ona o le a iai.
Pe a mae’a aloa’ia Gabbard mai lana galuega, e ono faasee atu le alii o loo sosoo atu ia te ia, Aaron Lukas e avea ma faauluuluga o lenei faalapotopotoga tāua a le malo tele, ae le’i faamaonia atoatoa lea manatu.
Sa faailoa ai i lea tusi a Gabbard lona agaga faafetai i le Alii Peresetene ona o le faatuatuaga sa lafo mai ia te ia na te ta’ita’ia ai le DNI, ae peita’i, ona o le tulaga tugā o le gasegase ua aafia ai lana tane, ua ia faia ai lenei filifiliga tāua, ona e lē mafai ona ia taumafai e ua’i lelei atu i le tulaga ua iai le gasegase o si ona to’alua a o tatau ai foi ona ia taula’i atoatoa i le faatinoga o lana galuega.
O le tama’ita’i o Tulsi Gabbard na soifua mai i le aso 12 o Aperila, 1981, i Leloaloa i Amerika Samoa, peita’i o le tele o lona soifuaga na soifua ane i Hawaii, ma o inā foi na amata fofoa ai lona olaga i upufai o malo poo polokiki.
O ia o se tasi o alo e to’alima o Mike Gabbard ma Carol Porter Gabbard, ma na avea foi lona tamā o se tagata faipolokiki sa galue mo le Setete o Hawaii.
