O le lapata’ia ai o le atunuu e le Faletupe Tutotonu o Samoa e faatatau i gaioiga faapisinisi e faafaigaluega ai tupe i le auaunaga a le BG Wealth, ua faailoa e le Minisita o Tupe le afioga Mulipola Anarosa Ale Molioo, o ni lapata’iga e lagolagoina e le malo.
Ua faailoa ai e le minisita i se pepa o faamatalaga faalaua’itele e ala mai i le ofisa sooupu o le malo, e lē lagolagoina e le malo lea auaunaga tau pisinisi.
O lea pepa o faamatalaga faalaua’itele ua tali ai le minisita ma le malo i ni lipoti sa faasalalau ai ata o ni Minisita o le Kapeneta ma sui o le BG Wealth.
Faaalia e le Sui Palemia o ia foi o le Minisita o Tupe i lea lava pepa o faamatalaga,
“O le Faletupe Tutotonu o Samoa o le Ofisa Tuto’atasi latou te māta’itūina ma faatonutonuina taunuuga o soo se matā’upu e aafia ai tulaga tau tupe, ma puipuia le atunuu mai lamatiaga i soo se faiga taufaasesē poo le taufaavalea e faaaogā ai seleni.
Ua faamanino mai foi i le finagalo o le afioga Mulipola Anarosa Ale Molioo,
- E lē lagolagoina e le Malo le BG Wealth i soo se itu
- E le’i tuuina atu ni pemita, lesitala, poo se faatagana mo lea kamupanī e faatino ai se auaunaga tau tupe i Samoa
- E lē gata i lea, o le iai o sui o le Malo i ata na pu’e faatasi ma nisi o le mamalu o le atunuu poo tagata lautele, e lē o se faavae lea ua lagolagoina pe talia ai e le Malo se pisinisi poo se polokalame tau tupe.
Ua toe faamaonia foi:
- E leai ni talanoaga aloa’ia a le Malo e uiga i le lesitalaina o le BG Wealth.
Mo le silafia, e pei ona faailoa e le minisita o soo se kamupanī e fia faatino i totonu o Samoa, e tatau ona usita’ia tulafono ma le faagasologa talafeagai e ala i Ofisa Faatonu o le Malo.
O le fautuaga ma le lapata’iga a le Sui Palemia ma le Minisita o Tupe,
- Faaeteete i le faia o faai’uga tau tupe
- Ia tausisia fautuaga ua tuuina atu e le Faletupe Tutotonu o Samoa [C.B.S.]
- Ma aua le auai i polokalame e le’i faatagaina ma e le’i lesitalaina i totonu o Samoa
- Ia lipotia i le Faletupe Tutotonu o Samoa [C.B.S.] poo se Ofisa o le Matāgaluega o Leoleo o latalata ane, nisi o latou faia ni gaioiga faasolitulafono o loo aafia ai ni faiga taufaasesē i tulaga tau tupe.
