E valu moliaga a leoleo ua faamaonia e le faamasinoga faasaga i le afioga Mase Mahonri Schwalger sa avea ma faia’oga ulu o le aulakapi a le atunuu le Manu Samoa.
O le taunuuga lea o iloiloga ma su’esu’ega a le Faamasinoga Maualuga ma aumai ai i le Aso Gafua le faai’uga a le afioga i le Faamasino Sinia o le Faamasinoga Sili le afioga Vui Clarence Nelson.
O moliaga ua faamaonia e aofia ai le faaoolima matagā, faaoolima, ma le faaoolima i le faamoemoe e faatino se feusua’iga.
E to’alua tama’ita’i na aafia i le solitulafono o le tasi e 19 tausaga le matua i le taimi o le solitulafono ae o le isi e 14 tausaga le matua.
O loo faaauau pea ona tapu pe faasā e le faamasinoga ona faailoa soo se faamatalaga e iloa ai tama’ita’i na aafia, ma o le aso 5 o le masina fou o Iuni le Aso Faraile o le vaiaso a sau e tuuina atu ai folasaga a loia ma se lipoti a le ofisa faanofo vaavaaia e tapena iai se faai’uga a le faamasinoga e ala i se faasalaga.
O loo faaauau ona tatala i tua i aiaiga ua mae’a faataoto le afioga Mase Mahonri Schwalger e faatali ai le isi valaauga o lea matāupu tau faamasinoga.
