Ua savalia le ono masina o tapu le auaunaga faasalalau i luga o upega tafa’ilagi le Maota o Viiga i se faai’uga a le Faamasinoga Faaitumalo na tuuina mai ia Tesema o le tausaga na te’a nei, peita’i o le Aso Faraile ua mavae na talia ai le talosaga a sui faasalalau o lea polokalame na finauina e le la loia, ma ua toe tatala ai le faaauau o le polokalame o loo faaaogā ai upega tafa’ilagi.
Peita’i ua ave iai aiaiga i le faatonuga e lē faatagaina ona toe faia ni faasalalauga e aafia ai lē o loo tagi.
I le talosaga a leoleo e faaaogā fesoota’iga i luga o upega tafa’ilagi e faia mai ai le molimau a lē ua tagi e aunoa ma le malaga mai i Samoa, ua lē talia.
Ua faatonuina ai e le faamasinoga le tatau ona malaga mai i Samoa o lē ua tagi.
Ua faatulaga e le faamasinoga le aso 28 o le masina o Iulai e valaau ai molimau o le tagi o le taufaaleaga faasaga ia Toleafoa Sai’a Toleafoa ma lona faletua o Iliganoa Savaiinaea o sui faasalalau o le polokalame o le Maota o Viiga e faamautū i Sini Ausetalia.
O le tasi o talosaga a i la’ua o loo molia sa finauina e le la loia, o le taofia lea o le faaauauina o le faamasinoga ona e leai se malosi faaletulafono o le faamasinoga a Samoa e su’esu’eina ai, ona o i laua o loo tuua’ia e faamautū i Ausetalia, ua teena.
