O le faalavelave na tupu i le atunuu o Vietnam i le Aso Tofi ua mavae ma maliu fasia ai se tagata Ausetalia e iai ni ona sootaga i gaioiga o fuālaau faasāina ma se vaega poo se kegi ua faaigoa o le Coconut Cartel, ua vavala mai i ni faamatalaga ma sa’ili’iliga aemaise o ata ua maua o alii talavou o loo masalomia i le faia o le faalavelave, o ni tagatānuu o Samoa.
Photo: Seven News Australia
O se fale’aiga i se tasi o aai ma taulaga o Vietnam e pei ona lipotia na faatino ai lea faalavelave na faaaogā ai se laaumalosi.
Ua faailoa i lipoti o i la’ua o loo sa’ilia ma masalomia o ni tagatānuu o Ausetalia peita’i o faamatalaga ma molimau mai sa’ili’iliga ua faailoa ai o ia alii talavou e mai ni afio’aga i Samoa e tulalata i le taulaga.
O faamatalaga e le’i faamaonia o loo faailoa ai o se tasi o alii talavou sa galue i se kamupani tuma’oti tau fesoota’iga a o le tasi sa galue i se pisinisi e totogi ai taavale e fia faaaogā poo se car rental.
O lipoti anapo ua faailoa ai o sa’iliga a leoleo Vietnam ua pu’eina ai ia alii talavou ma ua taofia nei mo su’esu’ega.
