O tapenaga a le soā komiti o tuuga vaa mo le 64 tausaga o le Tuto’atasi, o lea ua faailoa e le komiti e 6 fautasi ae lua tuuga.
O le tuuga muamua i le Aso Gafua aso muamua o Iuni i le 4 i le afiafi, o le a tutuu uma ai fautasi e 6 e faaaogā ai sipuni laau.
O le tuuga i le taeao o le Aso Lua le aso 2 o Iuni e fā fautasi o le a tausiniō ai e faaaogā ai foe sipuni.
Ua faaalia e se sui o le komiti, o vaa ia e fā e aofia ai le fautasi o le afio’aga o Apia, Le Tolotolo o Tamauli, Little Rina mai Toamua, ma le fautasi o le Malu o le Malo.
O le tuuga e faaaogā ai foe laau o fautasi uma e ono e aofia ai Le Tolotolo o Tamauli mai Salelologa i Savaii, Apia Maroon mai Apia, Telefoni o le Vainuu mai Apolima, Fiatau i le Vasaloloa mai Salua Manono tai, Little Rina mai Toamua, ma le Malu o le Malo e faaauvaa e nisi o malu o le malo ma nisi o le pulega o le tineimu ma galuega lavea’i i taimi o faalavelave faafuase’i.
O le Aso Tofi o lenei vaiaso e fono ai kapeteni o fautasi ma le komiti o tuuga vaa mo le faia o le se’iga pepa e pei ona faailoa mai e se sui o le komiti.
O le fono foi lea o le a faamautinoa ai ma faailoga ae o loo iai le fuafuaga e ese faailoga mo tulaga o fautasi i le tuuga muamua e faaaogā ai foe laau, ma tulaga o fautasi i le tuuga e faaaogā ai foe sipuni.
