I le mae’a ai i le Aso Gafua o lenei vaiaso o aso faigaluega e sefulu poo working days e avanoa ai ona faaulu se tagi tau palota i le tuana’i o le palota laitiiti a Vaimauga 3, o lea na faailoa aloa’ia i le aso 4 o Me le filifilia o le afioga Lautimuia Uelese Vaai e tauave le nofoa o lea itumalo i le paea’iga 18 a le Palemene, o le Aso Gafua lava o le vaiaso nei na faaulu atu ai i le faamasinoga ma le tagi o moliaga o faiga faaālatua poo se election petition.
Ua faamaonia mai e le Ofisa Sili o le Matāgaluega o Faamasinoga ma le Faafoeina o Matāupu Tau Faamasinoga le susuga Papalii John Taimalelagi Afelē, e tasi le tagi ua faaulu atu, ma o le tagi a lē sa avea ma faipule o le itumalo le afioga Taioaliiseu Fiti Aimaasu.
Ua tālia nei le aso e valaau ai lea tagi tau palota mo le tagofia e le Faamasinoga o Faigāpalota.
