Ua oo le lagolago ma le fesoasoani a le faalapotopotoga o le soifua mālōlōina o le lalolagi, i polokalame a le faalapotopotoga o le Toomaga mo ē Puapuagatia o loo fesoasoani ai i olaga o fanau ua aafia i sauāga, i latou o loo tausia ma vaaia e lea faalapotopotoga tuma’oti i Samoa.

Ua ave le lagolago a le soifua mālōlōina o le lalolagi i le a’oa’oina o fanau e 18 ua sauāina i le faia o togalaau ’aina ma togalaau faisua, ma le faamoemoe o le a mafai e ia fanau mai le 12 i le 18 tausaga le matutua ona faaaogā fua o laau tau faatoaga e gasese ai taumafa eseese e tausi ai lo latou tino ma le ola mālōlōina.

O se tasi lea o polokalame ua taumafai ai le Toomaga e saga tapu’e le mu’amu’a o le olaga o ia fanau ae ua afaina i sauāga, e lē gata o le tino ae o le mafaufau.

Ua faafetaia e le Pelesetene o le faalapotopotoga le faletua o Siliniu Lina Chang le faalapotopotoga o le soifua mālōlōina o le lalolagi poo le WHO i le lagolagoina o taumafaiga a le Toomaga mo le toe fuata’ina o le ola tuputupu a’e o fanau o loo tausia i le nofoaga o le Campus of Hope.