Ua iai se valaau mo le faia o tuipuipui mo le RSV poo le Respiratory Syncytial Virus mo tamaiti i Ausetalia i Saute poo South Australia ina ua maitauina le siitia o le aofai o tamaiti aafia.
Ua lipotia i le asō e le 9News e 6,321 i latou ua aafia i le vairusi lea i le tausaga nei ma ua sili mamao atu nai lo le tausaga na te’a nei.
Fai mai molimau a nisi ua aafia ai e amata lava i auga e pei o le flu ma faasolo atu ai lava ina faalogoina le fufusi o le fatafata, tale ma tau lē mafai ona tautala lelei.
Ua faailoa foi o nai tamaiti i lalo o le 5 tausaga le matutua e matuā tigaina i lenei vairusi aemaise foi tagata matutua e silia ma le ta’i 65 tausaga.
Ua amata ai loa ma le polokalame e faia fua ai tuipuipui o le fanau i Ausetalia i Saute ae ua faailoa foi e le malo e lē o iai se tuipuipui sa’o o le RSV i le Pharmaceutical Benefit scheme ae o loo iai se sapalai e faatapulaa e mafai ona faaaogā mo tamaiti.
Puna o Faamatalaga: https://www.9news.com.au/national/south-australia-rsv-state-grapples-with-spike-in-cases-prompting-calls-for-free-child-immunisation-program/ceb9c4b9-18d3-4c91-83f2-9d2fd1ed87e0
