Na faaalia le agaga faafetai a se aiga Samoa i luga o upega tafailagi i le vaiaso nei ona o le auaunaga na ofo atu e le Kamupani Vaalele a le Samoa Airways e ala I faigamalaga I luga o le ea I le va o Upolu ma Savaii ua mafai ona feiloai ai ma lo latou tinā matua i ona toe taimi.
Na faafesootai atu le Radio Samoa I le kamupani a le Samoa Airways mo se faatalatalanoaga ma na taua e le faauluuluga o le kamupani i vaega o faalauiloa ia Robert Rounds o le gaioiga na faatino e le Samoa Airways na galulue faatasi ai ma le ofisa o malave vaalele I Samoa.
Na ia taua o le tū lava ma le aga a Samoa o le tuu atu o le tauau fesoasoani ma o le tulaga mataina foi lea o le Samoa Airways o le faamuamua lea o ona tagatanuu.
E pei ona silafia o le Aso Sa na tulai mai ai lenei gaioiga alofa ma e tapunia ai le tele o ofisa i lea aso, peitai e le’i toe faatali le kamupani vaalele ina ua tuu atu le talosaga a le aiga mo se faigamalaga faapitoa e malaga ai i Savaii e faatasi ma lo latou tinā matua.
Taua e Robert Rounds e ave pea le faamuamua a le kamupani i faigamalaga i le va o Upolu ma Savaii ona o loo tapunia pea faigamalaga i fafo atu o Samoa.
Na faafetaia ai e nisi o le aiga lea gaioiga alofa a le kamupani ma o latou taua , o nai itula na mafuta atu ai ma lo latou tina o le a teu fatu lea i o latou loto.
