Sa faamanino e le Alii Sui Palemia le Afioga Tuala Tevaga Iosefo Ponifasio i le Palemene le tusitusi mai o le vaega o le aufanafana a Samoa (Samoa Shooting Federation) ina ia suia le Tulafono o auupega lea ua silia ma le 60 tausaga le matua e lei faia lava iai ni suiga poo ni teuteuga.
O le faauilavea a le Sui Palemia na mafua ina ua tulai le Faipule o Safata 1 le Afioga Leaana Ronnie Posini ma faaaali lona finagalo i le tulaga umi o le Tulafono o Auupega (Arms Ordinance 1960) e lei faia iai ni suiga.
Sa faaalia e le sui faipule o Safata 1 popolega i le tulaga ua iai le atunuu ma le faatupulaia o faalavelave e tutupu mai ona o laaumalosi, ma sa ia aumaia ai le faalavelave na tupu mai Sinamoga i le faaiuga o le vaiaso ua mavae lea na faamanu’alia ai se talavou ina ua pasi se taavale ma tafana mai e se tagata sa malaga atu i lea taavale talavou sa savavali i le auala.
Na faailoa e Leaana o le tulaga o loo vaaia nei ua mafai lava ona talosaga le tagata 21 tausaga mo se laisene e aumai ai ana laau malosi ma pule ai lava ia i le tulaga o le auina mai o ana pusa fana i totonu o le atunuu.
O lana vaai ua matautia tele, sa ia ta’ua foi na pau lava i latou sa agavaa o faifaatoaga ae o lana silasila e lē toatele ni au faifaatoaga, peitai ua soona tele naua pusa fana ua auina mai i totonu o le atunuu.
Sa faailoa e Tuala o le vaai mamao lea a le faigamalo ua tulai nei lea ua faagasolo ai e le vaega o Tulafono toefuataina teuteuga o le Tulafono lenei ua leva tausaga na tusi mai ai la latou asosi ina ia faia iai ni suiga.
Sa tulai le Taitai o le Itu Agai ma faapea mai, afai lava o la e lelei le Tulafono e lē manaomia sona teuteuga, ma i lona malamalamaga o ia sa iai foi i le aufanafana sa iai lava laaumalosi sa a’o ai la latou fana peitai e iai i latou o ē tele tupe ua mananao ia aumai lava laaumalosi a le tagata ia e fanafana ai, o se tulaga na saunoa foi iai le sui o Safata 1 ma ia faapea mai e lē manaomia ni teuteuga ona se’i vagana ua tutupu ni faalavelave.
Ae sa faapea mai Tuala e lē tusitusi lima i le malo ua tuanai ae o mea sa tutupu i aiga ma aafiaga o laaumalosi o le ala lea sa taumafai mai ai tusitusiga e tele ae lei faia lava iai se faatatau i le Tulafono i lena taimi.
Na ia faalautele foi o le taimi nei o loo auina mai lava laaumalosi i lalo o le Tulafono, ana leai se Tulafono e lē taliaina e le faigamalo ua iai nei ona auina mai ni laaumalosi i le atunuu.
I le Tulafono lava ia a leoleo mo laaumalosi mo le lautele o le atunuu i le taimi nei, a manaomia sau laaumalosi e auina mai fafo, pe faatau foi i dealers i totonu o Samoa, e talosaga se pemita i aiaiga o le tulaga tonu e faaaogāina iai e pei o faatoaga ma lafumanu.
Ia mautinoa e faamalieina itu uma, e manaomia foi lipoti a le fomai faapea le faifeau, o le tusi a lou toalua ma le lipoti a leoleo pe lelei lou talaaga o manaoga ia o le talosaga.
E tatau foi ona auai i le aoga e faia e leoleo ma le suega, afai e pasi le suega ona faatoa agai atu lea o leoleo e fai le asiasiga i le faatoaga poo le lafumanu ina ia mautinoa e sa’o lelei le tulaga o loo e talosaga atu ai.
Ia fausia foi se nofoaga lelei e teumalu ma loka ai le laaumalosi i lou aiga.
Ae mo le au taaalo fanafana ua talia tagata i le 18 tausaga pe afai e avatu le faamaoniga i le Asosi Fanafana a le atunuu e te auai ai i lea Taaloga.
O le taimi nei e i lalo ifo o le 5 dealers poo i latou ua faia pisinisi e faatau atu ai laaumalosi ma ututau i totonu o le atunuu.
