O se tala mai le faamasinoga, o se alii talavou 20 ma ona tupu tausaga le matua ua amata tuli nei lona faasalaga 12 tausaga i le falepuipui, ina ua faamaonia e se laulau o faatonu na iloiloina mau a leoleo, lona faamalosi o se teineititi e i lalo o le 12 tausaga le matua.

E tolu isi ona moliaga e fesootai lava i le solitulafono na ia faia ua faamaonia foi ae ua tuli faatasi uma i le 12 tausaga ua nofo sala ai.

O le mataupu lenei na tulai mai ia Tesema o le tausaga e 2020 i se aiga o se afioaga i Savaii, ma o lē na aafia ma lē ua molia ma faasalaina sa nonofo uma i se aiga e tasi, ae o lē ua falepuipui sa ia teena tuuaiga, peitai ua ioe le faamasino i le sa’o o le faaiuga a faatonu na iloiloina mau.

O le teineititi na aafia o lona tamā moni e nonofo ma le tuafafine o lē ua faasalaina. O lona uiga e ese lona tina.

Ua tapu e le faamasinoga ona faailoa suafa ma nisi lava faamatalaga ona o le puipui i le teineititi na aafia ona o le puipuiga malu o lē na aafia mai ni aafiaga o lona mafaufau i le mea na tupu.

Ae i le faaiuga a le faamasinoga o talosaga apili i le mataupu na toe talosaga ai Kolani Junior Lam e iloilo le faaiuga na faamaonia ai lona moliaga o le fasioti tagata faamoemoeina, o lea faatoa maua le faaiuga tusitusia a faamasino mai Niu Sila.

Ua faailoa i le faaiuga ua teena le talosaga apili ma ua faatumau le faamaonia o lea moliaga e tusa o le faaiuga a le faamasinoga maualuga, peitai o moliaga o le faaoolima ma le taumafai e faalavelave i le faia o le amiotonu, ua teena ma faaleaoga e le faamasinoga o talosaga apili le iuga a le faamasinoga maualuga na faamaonia ai ia moliaga e lua.