I le faaauau ai pea ona tuuina mai e le matagaluega o le soifua maloloina lipoti o le pipisi o le faama’i fiva ponaivi le dengue fever, ua faamauina i le lipoti lata mai o faamaumauga o le aso muamua i le aso 8 o le masina nei o Iulai, e toasefululua (12) tagata na faamaonia a latou su’ega poo test ua maua i āuga o le fiva ponaivi.

E iai le talitonuga o loo tumau pea ona iai le atunuu i lapataiga o le pipisi o lea gasegase e pei ona sa faailoa ia Aperila o le tausaga nei e le Faatonusili aoao o le soifua maloloina le aafia o le atunuu i le pipisi o lea faama’i.

O tagata i le va o le 20 i le 29 tausaga o loo faamauina sa sili ona aafia, faapea le matutua o le 50 i le 59 tausaga ma le 60 i le 69 tausaga o le soifua.

Talu mai Novema o le tausaga na te’a nei na amata ona iloa ai le toe maua o tagata i le fiva o ponaivi, ae leai se ola ma se soifua ua fano ai.