O le kamupani o le Bluewave Wireless lea o loo faapipiina satellite e maua ai fesootaiga initaneti mo aoga i Savaii ma Upolu, ua latou faia se foai taua o masini komepiuta mo nisi o aoga a itumalo i le tatou motu tele i Salafai.

O se foai ua maua ai ia masini e fanau, ma faiaoga e faaaogå e maua ai faamatalaga i mataupu tau aoaoga.

O le itumalo o Salega Tasi e tai sefulu masini komepiuta laiti poo laptops mo le lua o aoga tulagalua i totonu o le itumalo faapea masini faapea e 13 mo le Kolisi maualuga a Palauli i Sisifo.

Faaalia e le faipule o Salega Tasi, Afioga Fepuleai Faasavalu Faimata Su’a, e taugata tele masini ae ole agalelei o le kamupani o le Bluewave Wireless ua maua fua ai e fanau a le itumalo ia masini mo fesootaiga auā le aoaoina o fanau a lona itumalo.

Le sui faipule o Salega Tasi, Afioga Fepulea’i Faasavalu Faimata Su’a.

O lea foi ua afea aoga a le itumalo o Palauli Numera Tasi i le fesoasoani lava lea a le kamupani o le Bluewave ua maua ai e le aoga tulagalua i Taga laptops e 10, o Gaga’emalae e 12 masini komepiuta, ma aoga o after schools centers a Siutu ma Foailalo le tai fitu laptops.

O le faipule tamaitai o le itumalo o Palauli Numera Tasi le afioga Mulipola Anarosa Ale Molioo sa ia taliaina lea foai.