Ua i luma o le faamasinoga le talosaga a loia a leoleo o loo finauina moliaga e 19 o Lise Schmidt, ina ia talia o se vaega o mau a leoleo le faamatalaga tusitusia a Papalii Sia Figel ua maliu sa tuuina atu i leoleo.
O moliaga a leoleo o loo tuua’ia ai Lise i lona faia o ni faamatalaga lē sa’o ma lē moni, i ni tuua’iga i le iai o ni aafiaga o lē sa avea ma Palemia le afioga Fiame Naomi Mataafa i le maliu o le tama’ita’i polofesa o Dr Caroline Sinavaiana Gabbard.
O le tusi a Lise na tuuina atu i le Ao o le Malo ma lē sa avea ma Komesina o leoleo o loo faailoa ai ia tuua’iga.
O le Aso Faraile nei e toe oo atu ai i le Faamasinoga Faaitumalo le talosaga a leoleo mo se tali a le loia o loo tula’i mo lē ua molia.
O Papalii Sia Figel sa molia i le maliu o le tama’ita’i polofesa ae na maliu i le masina amata o lenei tausaga a o i lalo o le vaaiga a leoleo e faatali ai le lauina o se faai’uga o su’esu’ega i moliaga sa tuua’ia ai.
O le māfua’aga lea o le talosaga a loia a leoleo i le faamasinoga ina ia talia le faaaogāina o le faamatalaga tusitusia a Papalii e avea o se tasi o ana molimau autū.
