Ua talosaga le loia a leoleo ia Magele Leone Su’a e tusa ai o le tagi a Asiata Pio Vaoliko mo se faatagaga a le Faamasinoga e fai mai ai le molimau a leoleo o loo tagi e faaaogā ai le video link ona e lē o mana’o e sau i Samoa.
O se talosaga o loo tetee iai le itu a ē o loo molia ma ua tuuina mai ai se poloa’iga a le Faamasinoga ia faila atu se talosaga a le itu a ē o loo molia e faalēaogāina ai moliaga o loo faasaga atu ia Toleafoa Sai’a ma Ainuu Iliganoa Savaiinaea.
O le a toe fofogaina le matāupu i le Aso Faraile ma iloa ai le tulaga o le talosaga a leoleo ma le itu a ē o loo molia i le matāupu i luma o le tama’ita’i Faamasino o Alalatoa Rosella Papalii.
O le matāupu lenei o le tagi a Asiata e faapea ua faaleagaina lona ta’uleleia i ni faamatalaga sa faia i le polokalame a Toleafoa ma Ainuu, le Maota o Samoa Viiga o le Atua mai Ausetalia.
O Iulai lea na faatulaga e fofoga ai mau o le matāupu ma o loo teena e i la’ua ua molia moliaga faasaga ia i la’ua.
