Sa tau fuafua, tau saili, ma tau faamaopopo se auvaa o le mafuataga a le Itumalo o Aleipata i Aukilani.
Ua ese le agai mai o sui o nuu taitasi o loo i totonu o le itumalo o Aleipata e lagolago le mafutaga ua tuufaatasia i totonu o Aukilani e talitali le valaau na tuuina mai e le pule aoga ma le ofisa o faiaoga i le aoga a le itulmalo e fia sau le malaga a tama taaalo i Niu Sila.
O lea faamoemoe ua maua ai le auvaa toatele i alo ma tama fanau, aemaise o tina ma tamā matutua o Aleipata atoa i totonu o Niu Sila latou te faatuina ai se mafutaga e sailiili ma tapenapena auā le faamoemoe o le aoga i le malaga mai ia Novema i le tausaga nei.
E amata mai i Lalomanu e oo atu i Tiavea ua auai uma o latou sui i lenei mafutaga.
Ma ua ese foi le lagona o lea itumalo ina ua mafai ona tuufaatasia se mafutaga faapenei e ese mai i mafutaga a afioaga ma nuu e pei ona masani ai.
O le aoga lea sa faaigoa ia Vaisuli ae ina ua iai fesuiaina i igoa o aoga i Samoa ua mafua ai loa ona sui i le Kolisi o Aleipata.
O le malosi o le lagolago o le itumalo i lenei tapenaga ua susue ai ma faamalama a nisi o aiga o loo aumau i nisi pitonuu o Niu Sila ua latou togi maa mai ina ia maualuga ma lelei fuafuaga a le mafutaga.
O lagona faageetia o aiga o le itumalo ina ua latou maua le tala o le Kolisi o Aleipata lea na sola ma le siamupini o le taamilosaga a tama o le lakapi a aoga i Samoa.
E le gata i lea o alo ma fanau o le itumalo sa faafailele mai o latou olaga taalo i totonu o le Kolisi o Aleipata lea ua faamanuiaina i le Manu Samoa taitoafitu ma sikolasipi i Niu Sila, pei o le alii o Faafoi Falaniko, Malakesi Puna Masefau ma le alii o Eletise Ese lea ua sikolasipi mai i Massey High School.
O le aso 27 o Novema lea ua fuafua e taunuu mai ai le aumalaga e 40 e aofia ai le fanau taaalo ma nisi o fanau e lavevea i faafiafiaga.
O loo iai foi aoga ma kolisi i Niu Sila nei o le a maua le avanoa e fai ai taaloga.
Ma o le faamoemoe maualuga pe a toe foi le malaga o le fausiaina lea o se hall taalo mo le Kolisi o le itumalo o Aleipata aua lava le tapueina ma le faafaileleina o taleni ma meaalofa o loo i alo ma fanau o le itumalo.
