A itiiti mai e to’a 22 tagata ua fasiotia ma e aofia ai tamaiti e to’afitu i le osofa’iga a Isaraelu i se nofoaga o se a’oga sa faamautū iai le faitau afe o tagata ua leai ni mea e nonofo ai i le ogatotonu o Gaza, o le faamatalaga lea mai sui o se maota gasegase i lea faaitu.
E to’atele foi o loo manunu’a ma o nisi o ata ma videos ua faaali ai aafiaga o ia osofa’iga ma le tau sa’ilia o nisi e talitonuina ua manunu’a ai.
O le faamatalaga mai ia Isaraelu ua ta’ua ai o le osofa’iga sa taula’i i nofoaga a le ‘au faatupu faalavelave o loo galulue i faatonuga mai le Hamas.
Ua lipotia ua faalogoina le tauvalaau o nisi mātua i le vaega a le Hamas e aga’i ese ia mai Gaza aemaise ua aafia ola o a latou fanau ona o le aga’i atu ma lalafi i nofoaga o iai tagata lautele.
E molimau sui o faalapotopotoga fesoasoani a Malo Aufaatasi i Sasae Tutotonu ua faasolo pea ina atili faateteleina tulaga lē manuia i Gaza, ua o latou ta’ua foi o lalo o tulafono faavaomalo e faatatau i tagata soifua e ao ona puipuia tagata lautele ma o latou mana’oga tau le soifuaga e pei o taumafa, mea e nonofo ai, suāvai ma le soifua mālōlōina.
Puna o Faamatalaga: https://edition.cnn.com/2025/05/06/middleeast/israel-gaza-airstrike-school-compound-intl
