E le’i atoa se vaiaso talu ona malaga ese atu le Peresetene o Amerika, Donald Trump ma Saina ae o lea ua faailoa mai i lipoti a le CNN le taunuu atu i Saina o le Peresetene o Lusia o Vladimir Putin mo sana foi malaga faalemalo e feiloa’i ai foi ma le ta’ita’i o Saina, Xi Jingpin.
Fai mai le lipoti o loo tau fai silasila malo uma ia e lua pe ono iai sa la gaioiga e fesoasoani ai i le faamae’aina o le taua i Iran aemaise o aafiaga i le lalolagi atoa.
O le asiasiga la a Putin i Saina i le vaiaso nei o le faa 25 ai lea o taimi ua faimalaga ai i Saina i totonu o le silia i le 20 tausaga talu ona avea ma ta’ita’i o Lusia.
Fai mai sa faatali lelei ane le faigāmalo i se faafeiloa’iga aloa’ia a le malo o Saina ma e lē o le ulua’i taimi foi lea ua faia ai ni talanoaga i le va o ta’ita’i ia e lua ma e lē taumate e tele ni matāupu o le a talanoaina i lea fonotaga.
O Lusia lea o loo sapalaia ane le suāuu ia Saina ma o vevesi i Sasa’e Tutotonu e lē taumate o le a faatetele ai ona faamoemoe Saina i le fesoasoani a Lusia i le matāupu i le suāuu.
Puna o Faamatalaga: https://edition.cnn.com/2026/05/19/asia/putin-china-visit-xi-meeting-intl-hnk
