Ua amata ona faagasolo polokalame ua tapena e le faalapotopotoga o tagata tusitala ma faasalalau a Samoa ma faamanatu ai ma le atoaga o le iupeli auro poo le 50 tausaga talu ona faatūina le faalapotopotoga e nisi o tamalii ma failauga, o faletua ma tausi sa auauna ma galulue i lea tomai i Samoa i tausaga ua mavae.
O le ta’ita’i o le malo i le Palemia, susuga Laaulialemalietoa Leuatea Polataivao Fosi na faatumutumu iai le mamalu o malo valaaulia na auai i le sauniga na tatala ai lenei vaiaso, lea sa faailoa ai e le ta’ita’i o le malo lona lagolagoina o lea auaunaga tāua auā o soo se atunuu temokarasi o le tasi lea o tautua e mana’omia i taimi o puapuaga i mala faalenatura mo le taulogologoina o tagata.
O le fe’au taumolimoli mai le sui o le malo o Ausetalia ma le sui o le faalapotopotoga a Malo Aufaatasi le UNESCO ua salani ai le tatalaina o le vaiaso ona e tutū faatasi i le lagolagoina malosi o le pitolaau a tusitala ma le aufaasalalau e lē gata i Samoa ae o le lalolagi.
I le atoaga o le 50 tausaga o le faalapotopotoga o le J.A.W.S. ua ave le faaaloalo i ē sa faavaeina le faalapotopotoga e pei o le afioga Seuseu Faalogo Pito sa avea ma tusitala ma faatonu o le nusipepa o le Samoa Times, o le afioga Le Tagaloa Pita sa faagaioia le nusipepa o le South Sea Star, ma le afioga Savea Sano Malifa o se tusitala sinia sa ia faavae ma amata le nusipepa o le Samoa Observer.
O ia foi tamalii ma nisi sa amataina le J.A.W.S. o i latou o sui faavae poo founding members o le faalapotopotoga.
