Ua iai le popolega i le saogalemu o auaunaga a trains i aai a Ueligitone faapea Aukilani, ma ua faia ai e le NZ Transport Agency (NZTA) suesuega faavavevave.
O le popolega i le itu tau saogalemu, o le pulea o itu e ono lamatia ai faapea le galulue faatasi o itutino i auala e manuia ai tagata lautele, o itu nei ua agai iai le pulega.
E lē fou le sau o tala i le feeseesea’i o itutino o loo pulea auaunaga nei, KiwiRail, Auckland One Rail ma le Transdev i Ueligitone.
O le KiwiRail o ia lea e anaina ma pulea auala trains o loo feoa’i ai trains a Aukilani faapea Ueligitone, ma o ia foi e toatasi o loo pulea fela’ua’iga o uta faamomoli lea e faaaogāina auala nei.
I taimi ua mavae na faitioina ai e kamupani nei e tautuaina feoa’iga a trains, o loo faamuamua e le KiwiRail ana auaunaga nei o loo fela’ua’i uta nai lo o trains o loo faaaogāina e tagata lautele mo femalagaa’iga.
A o fefāloa’o ai la itutino nei e i totonu o auaunaga a trains ma aafia ai ma tagata lautele o loo faamoemoe i nei auaunaga, o le asō e feiloai ai le minisita o fela’ua’iga, Simeon Brown ma le KiwiRail, o le Auckland OneRail faapea le Auckland Transport ma o le sini o lea feiloaiga o le faamanino lea o le tatau ona galulue faatasi ma ia faamuamua tagata i faai’uga o loo fai.
Puna o Faamatalaga: NZTA urgently investigated safety concerns raised by Auckland and Wellington train bosses against KiwiRail; Simeon Brown to meet Auckland rail companies Monday – NZ Herald
