Na lipotia i le Newshub i le aso ananafi le valaau ai o le aufaipisinisi mo le suia o nisi o tulafono ina ia foia ai nisi o faafitauli o loo aliae pea i le ogatotonu o le aai.
Ta’ua i le lipoti faamatalaga mai le aufaipisinisi e faapea ua tauau lava ina lē mafai ona faatonutonuina amioga a tagata i le aai.
E lē o toe po se lilo ua leva foi ona valaau nisi mo le faaopoopo o malu o le malo i le aai aemaise o se ofisa o leoleo i lea nofoaga ona o le tele o le mau faalavelave e tulai mai ai.
Lea la ua mananao nei le asosi o le aufaipisinisi i le city ina ia faia se suiga i bylaws poo tulafono faalotoifale ina ia maua ai le malosiaga o le Council i mataupu ia pe afai e lamatia ai le saogalemu o tagata lautele.
E manatu le asosi o le aufaipisinisi o tagata ua faatu pisinisi i le city ma aumau ai i apartments i lea faaitu e iai lo latou aiātatau i se siosiomaga lelei ae lē o le lamatia ai o soifua i tagata onanā solo i le taulaga ma i latou e faaaogaina fualaau faasāina.
