Ua faama’alo i’u’ofe e le Minisita o le matagaluega o Pisinisi Alamanuia ma Leipa le tofa Leatinuu Wayne Sooialo, se ālafua o le a faatino ai ni suiga i le polokalame o tagata faigaluega faavaitaimi, i le filiina o tagata e agavaa ma fetaui tonu iai aiaiga o tagata e manaomia mo ia galuega.

Ua faama’alo foi e le Minisita se faiga o le a saili ai le numera o tagata faigaluega faavaitaimi e mana’omia mai Niu Sila ma Ausetalia, e pei o le vaevae o le aofaiga atoa o avanoa faigaluega i itumalo faapalota e 51. O se faiga na faaalia e le Minisita o le a taofia ai faafitauli o le iloiloina uma o talosaga e le Matagaluega o Alamanuia, Pisinisi ma Leipa ma le silafia ai, o nisi o loo talosaga atu o faiaoga ma tagata e iai tomai aoaoina i galuega i le atiina a’e o tagata tafafao poo isi galuega tau tomai faapitoa e pei o tausi soifua. 

Leatinuu Wayne Sooialo: “E lē umi foi se manatu i le tulaga o galuega faavaitaimi, ona o lea ua amata ona galulue le komiti. Le komiti lea e toe aiaia ia aiaiga ma tuutuuga aemaise foi le tulaga o le pikiina o tagata i galuega faavaitaimi. E pei ona ou ta’ua i se taimi ua tuana’i, o i latou e tatau ona faamuamua i galuega nei, o i latou e leai ni galuega, o unemployed. Ae foliga mai, o le process lea o loo faatino i le matagaluega i le taimi lenei, o loo alu a latou i tagata e sau e fai mai e leai sana galuega o iai. A faapea a la e sau le foma’i, le tausi ma’i poo le leoleo poo le faiaoga ae faapea mai le matagaluega o a’u e leai sa’u galuega, e leai se mea a le tatou matagalugea e mafai ona fai i ai, ona o la e sau i luga o le tulaga e lē o faigaluega. Lea la ua iai le aiaiga i le taimi lenei, o lea ua iai le komiti…..

……O le komiti lenei o loo iai, o le Samoa Hotel Association, o latou ia e pito sili ona aafia, ona ua ave uma a latou tagata i le taimi lea sa lockdown ai le atunuu. O le Chamber of Commerce sui o le International Labour Organization poo le ILO, Samoa National Council of Churches aafia ai ma aulotu ona ua leai ni aufaipese. Samoa Association of Manufacturers and Exporters, ua aafia ai foi ma latou ua leai ni tagata. O loo iai i totonu ma Poutasi Developmnent Trust, o latou ia ua leva ona latou faatinoina lenei galuega. O lea e aumai ai le latou expertise poo le latou fesoasoani i le tulaga lea. Samoa Workers Congress. Matagaluega o Tina ma Tamaitai ma Atina’e o Nuu ma Aga Fesoota’i. O le agaga o le minisita ma le agaga o a’u nei, aumai i tua le recruitment i itumalo ta’itasi. O lea ua iai ofisa o tatou itumalo. E pei ona ou fai atu i le taimi muamua, a faapea e aumai ni request employees mai fafo, e 8 afe ni tagata e mana’omia, vaevae i itumalo e 51, ta’i 160 a le itumalo, recruit mai iinā. A aumai loa la i totonu i iinā, aumai faaalu i le matagaluega lea o pisinisi ma alamanuia, aemaise o la e silafia e itumalo a latou tagata ia e aumai ma latou fanau ia e aumai. A oo la ina faaletonu mai o, a la e mafai ona alu atu le matagaluega i le itumalo, ia tou faanau ia na aumai e ave i o ua faaletonu.” 

Le afioga i le Minisita o le Matagaluega o Pisinisi, Alamanuia ma Leipa le tofa Leatinuu Wayne Sooialo.