O le Sisigafu’a muamua lenei a le afioga i le Konesula Aoao o Samoa le afioga ia Afemata Palusalue Faapo II i lana uluai nofoaiga ina ua filifilia e le malo o Samoa e avea ma Konesula Aoao o Samoa i Aukilani.  

O lana saunoaga faalemalo na ia faafetai ai le alofa o le Atua auā o le faamoemoe ua taunuu o le laau lea o le soifua ua tatou aulia mai ai le 62 tausaga o le tutoatasi o Samoa. 

O le malo na tauasa mai e tuaa ua fai i lagi ma lagomau mai i tiasa, ina ia maua e Samoa uma le ola saoloto, mai pulega faakolone. 

“Ne’i mea ane ua galo” aua ne’i galo ia te i tatou le mau a pule ma tumua  sa taase i le vao ona o le saili malo. 

E manatua ai le masoe o le tama aiga Tupua Tamasese Lealofi ma nisi o toa na faaaunuua ona o le manatu ia Samoa ia mafai ona saoloto mai pulega a isi atunuu. 

O le latou tautua toto lea ma le latou saili malo mo se saolotoga o Samoa ma ona tagata, lea ua tatou ‘ae’ae ai nei ma saa i maa o mālie e pei ona faamanatuina ai lona 62 tausaga talu ona tutoatasi Samoa. 

Tele lu’itau sa feagai ma o loo feagai pea ma le tatou atunuu o Samoa, ua tuanai atu faama’i sa feagai ai, ae o loo feagai pea le lalolagi ma suiga o le tau ua afaina ai le siosiomaga ma faatoaga o Samoa. 

O taua ma fevaevaeaiga o nisi o atunuu o le lalolagi e maua ai le suauu ma ua afaina ai ma Samoa i le siitia pea o le tau o le soifuaga, ae o le upu moni, e pei o upu o le taeao e lē tuulafoaiina Samoa e le Atua i lona alofa e lē mavae o loo maua ai pea e Samoa le ola saoloto. 

E tusa ai ma le tala o le tupe a Samoa ua folasia nei i le Palemene i le 2024 i le 2025 o loo faaalia manino ai le mautu ma le solosolo lelei o le tamaoaiga o Samoa ua iai nei, ua silia ma le piliona le tupe o lea ua maua mai i tiute ma lafoga e aoina, faatasi ai ma tupe e maua atu i turisi ma tupe e avatu i faamomoli i atunuu i fafo ma Niu Sila nei, tupe faaagaga o loo iai nei ua oo atu foi ma le piliona e fuafua i faalavelave tutupu mai ae o loo lava pea tupe mo faafetaua’iga i le sili atu ma le sefululua masina. 

O le ivitu o le tamaoaiga o Samoa o tupe e faamomoli atu i aiga i Niu Sila ma isi atunuu mo nai o tatou aiga, nuu ma ekalesia faapea tupe o loo maua atu e tatou tagata o loo galulue i galuega faavaitaimi, tupe i tagata tafafao ua avea lea ma fesoasoani mo lona tamaoaiga i Samoa i lana tala faatatau o le tupe. 

Samoa e, o loo afifio ma papaaao i Niu Sila nei o le tou sao tāua lena ia Samoa ma lona tamaoaiga o la outou tautua ‘ai taumalele lena ua manuia ai Samoa ma ona tagata. 

O loo outou alolofa atu i aiga faapea le asiasi atu i Samoa lea ua toomaga iai le malo mo le manuia o Samoa. 

O a outou lafoga foi o loo ave i le malo o Niu Sila, lea ua mafai ai e le malo o Niu Sila ona tuu atu fesoasoani i le malo o Samoa e tauala i tupe e lagolago ai le atina’e o Samoa. 

O le sao malosi foi lea ua mafai ai e le malo ona faatino le poloketi miliona mo itumalo ina ia oo le fesoasoani i tagata lautele ma aiga e limavaivai le tamaoaiga ia maua se fesoasoani mai le malo e atina’e ai. 

O le avea ai o le afioga i le Konesula o Aukilani e fai ma sui o le malo na ia faaleo ai le agaga faafetai ma le faamalo a le malo o Samoa e ala i ona tagatānuu o loo aumau i Niu Sila nei i le latou tautua faalemalo. 

O upu masani e lele lava le toloa ae ma’au lava i le vai, pe nonofo i Niu Sila nei e susue lava le faamalama ma vaavaai atu i si o tatou malo o Samoa. 

Faafetai i lau tuatua ‘ai taumalele ma lau tautua apaapa, faamalo ua lē galo afia i si ona vao, faafetai le alofa i aiga, ekalesia aemaise le malo. 

Ia alofa le Atua o le puna o manuia na te faamanuia lo outou soifua i Niu Sila nei.  

Na afea foi i le faafetai a le malo o Samoa le agalelei ma le alofa o le malo o Niu Sila i le tele o le fesoasoani ua tuuina atu mo le atina’eina o le tamaoaiga o Samoa. 

Auā o Samoa lava ma Niu Sila e iai le laua feagaiga faaleuo ua ta’ua o le Treaty of Friendship ma o se faigapaaga faapitoa na o Niu Sila ma Samoa lea o loo mafai ona fetausia’i ai ma galulue faatasi.