O taitai o nisi o atunuu tetele i le lalolagi lea ua tuuina atu a latou faamanuiaga i le afioga i le tamaitai Palemia Fiame Naomi Mataafa ma lana Kapeneta i le tulai mai o le faigamalo fou a Samoa.
O le Palemia o Niu Sila na mua’i faamanuia atu ia Fiame ma lana faigamalo i le afiafi o le Aso Faraile 23 Iulai ina ua tuu mai le faaiuga a le faamasinoga e amanaia ai le faatautoga na fai i le Aso 24 o Me 2021.
Sosoo ai ma le taitai o Ausetalia Scott Morrison lea na telefoni i le tamaitai Palemia e ave ai ana faamanuiaga ma lana lagolago.
O le afiafi o le Aso Sa 25 o Iulai na momoli atu ai faamanuiaga a le Palemia o le Malo Fiti Josaia Banimarama mo Fiame ma le Kapeneta mo le isi 5 tausaga sosoo ai ma le faamanuiaga a le Malo Saina tauala atu i le sooupu a le Matagaluega o le Va i Fafo a Saina Zhao Lijian.
Na molimoli atu foi alofaaga ma faamanuiaga a le Malo o Amerika i le tamaitai Palemia i lona tulai mai faapea foi le ofisa o le Malo Aufaatasi le UN.
E le gata i lea o le Palemia o le Atu Kuki ua faaoo atu foi ana faamanuiaga mo le faigamalo fou ma o le Aso Lulu 28 o Iulai na tuuina atu ai alofaaga ma le lagolago a le Malo o le United Kingdom i le tamaitai Palemia ma faapea ai le failautusi o le Va i Fafo a lea atunuu e fa’aauau pea le galulue sosoo tauau ai o atunuu e lua.
Na ia faafetaia foi le tautua a lē sa avea ma Palemia i tausaga ua tuanai le afioga Tuilaepa Lupesoliai Sailele Malielegaoi.
