Fai mai Eddie Jones e lei faia ni a latou talanoaga ma nisi e faatatau i le galuega fou ua valaauina ai o ia e avea ma faiaoga o Iapani, se’i vagana lava le taimi ua mae’a ai le taamilosaga o le Ipu o le Lalolagi i lakapi.
O le vaiaso nei ua faamaonia mai ai i se faatalanoaga ma tusitala o Jones lea o le a avea ma faiaoga o le Brave Blossoms a Iapani ae sa iai lipoti na agiga muamua ia Setema faapea ua faatalanoa Jones mo le avanoa o le faiaoga mo le iuni lakapi a Iapani.
O loo tumau pea le faamatalaga a Jones e lei faia sana faatalanoaga e pei ona ta’ua ma na o le pau lana faatalanoaga na fai o le masina nei.
Na faailoa foi e Jones e manatu ia ua tatau ona agai i luma ma e faamanuia foi i le ‘au a Ausetalia.
Sa iai lana fuafuaga e fia faia se suiga i le lakapi a Ausetalia peitai e lei mafai ona faatinoina ona e lei lagolagoina e le Rugby Australia.
O lona uiga la o le faalua ai lea ona avea Jones ma faiaoga o le Brave Blossoms ma ua saunoa Jones o lona faamoemoe ia oo Iapani i le fā pito i luga o atunuu lakapi o le lalolagi.
