Ua tulai i luma o le faamasinoga faaitumalo mo le taimi muamua se matai ma se taule’ale’a o le afioaga o Sasina ua tuuaia i le poloka o se vaega o le auala o le malo na mafua ai ona lē faaauauina i lea itu o Salafai le solo a taavale a le vaega faaupufai e Puipuia Aiā Tatau o Tagata.
O lea solo taavale a le HRPP o se faalauiloa i lo latou lē taliaina o le faaiuga a le faamasinoga o talosaga apili na aloaia ai le faigamalo a le Faatuatua i le Atua Samoa ua Tasi. Ua lē tuuina atu no tali a’i laua na tulai uma o le faamasinoga faaitumalo ma ua molia o Faamalele Salasopa ma Seve Avaula Seve Panapa ona e lei maea suesuega a leoleo i lea mataupu e faamautu ai moliaga faaiu.
I nisi o tala mai le faamasinoga faaitumalo na toe tūtūla’i ai le toaiva o tagata o le nuu o Matautu Falelatai e aofia ai ni matai ma ni taulele’a ona o ni gaioiga solitulafono e pei o le faaleaga o meatotino (ofe paipa) ma taofia le oo atu o le suavai taumafa i nisi o aiga o le nuu ma taofia foi fanau a nisi aiga e lē toe ulufale i le aoga tulagalua a le afioaga.
Ua toe tolo lenei mataupu mo le lua vaiaso sei faamautu moliaga a leoleo ma o le tologa mulimuli lea. Faaalia e le Loia o le itu a leoleo o suesuega o loo faia pea e ono faaaopoopo ai se tagata molia. O le toaiva o i latou ua molia i lenei mataupu o Anae Mati Salu, Lupematasila Talatonu, Lupematasila Tusiga, Gagaifo Nanai Gagaifo, Taulia Lupematasila Pouvi, Tiai Misa Etuale, Salalau Sililo Tuisalogo, Ve’a ma Safotu Junior .
