I le faaauau ai i lenei Aso Gafua o aso mālōlō e lua mo tagata faigaluega uma a le malo lea sa amata i le Aso Faraile ua mavae e mafua ona o galuega sa latou faatino auā le taligamalo i le Fono a Malo o le Taupulega ua mae’a, ua faailoa i auala o faasalalauga le tolopo o nisi o mataupu i le Faamasinoga o Fanua ma Suafa, faapea foi le Faamasinoga Maualuga ua toe fetuuna’i aso e valaau ai nisi o mataupu tau faamasinoga e mafua ona sa leai ni faamasinoga na valaau i le vaiaso atoa sa faagasolo ai le Fono a Malo o le Taupulega.

O le taulaga ua molimauina le gaogao, tau leai ni tagata feoa’i ma tagata faatau i faleoloa ma isi pisinisi auā o le to’atele o i latou e vaaia i aso uma, o tagata faigaluega a le malo.

O a’oga a le fanau sa faamoemoe e a’e uma i le Aso Gafua o lenei vaiaso, o le a faato’ā a’e i le Aso Lua ma faaauau ai mo le kuata faai’u o lenei tausaga.

O su’ega a le malo ma su’ega masani i le faai’uga o lenei tausaga ua tapena ma sauni iai le fanau sa mālōlō mo le 3 vaiaso ona o le taligamalo a Samoa ua mae’a lea sa galulue ai le to’atele o faia’oga, o nisi sa avea ma leoleo fesoasoani, ae o nisi sa galulue i le vaaia o ta’ita’i o malo ma usugafono i le fono a ta’ita’i o malo o le Taupulega.