O se tasi o Iwi leader e suafa ia Mike Smith ua manumaloina lana aiātatau e ave ai i le tulafono i latou e tetele sa’o i le afaina ai o le tau poo suiga foi i le tau.
O le faaiuga a le faamasinoga maualuga ua tuuina mai i le asō ua toe faatulaga ai e le faamasinoga le mataupu a Smith ae sa faataatia ese muamua e le faamasinoga o Apili ona sa faapea e lei iai se faavae mautu o le finauga.
Fai mai Smith o le kulupu o kamupani e aofia ai le Fonterra, Z Energy, Genesis Energy, e iai le latou tiute faaletulafono agai ia te ia faapea ma isi i komiuniti ua matuā faaleagaina mai kasa eseese o loo vevela ai le paneta.
O le finau la a Smith ina ia taofia loa le faaleagaina o le siosiomaga pe ia vave foi ona faaitiitia le kasa oona e faamatuu atu i le siosiomaga.
O lona uiga la o le a toe faasee le mataupu lenei i le faamasinoga maualalo e toe faafofogaina ai le mataupu ma tuuina ai faamaoniga.
