Ua teena e Laaulialemalietoa Polataivao Schmidt moliaga e 16 a leoleo faasaga te ia.
O moliaga muamua e fā o loo molia faatasi ai Laauli ma i latou na molia muamua, le alii Faipule ia Fepulea’i Faimata Su’a, o Li’o Faataumalama, o Lise Schmidt, Samuelu Piki ma lona to’alua ia Sivai Kepi lea ua faatulaga e Iloilo mau ia Me i lona vaiaso e amata atu i le aso 25 aga’i i le aso 27 o Iuni o le tausaga nei.
O ia moliaga e mafua mai i le mataupu i le maliu o Tuau Maletino.
E iai moliaga o le faipule i le faalavelave i le su’esu’eina o le amiotonu, atoa ai ma le taupulepule e faia se soligatulafono, faapea le tuuina atu o faamatalaga lē moni.
O isi moliaga mulimuli e 12 na faamatuu atu e leoleo i le taeao analeila o le a valaau ai lona iloiloina o mau i le vaiaso e amata i le aso 25 o Aokuso o le tausaga nei lava.
O ia moliaga e aofia moliaga e lima o le faasoesa e faaaogāina ai auala o faasalalauga, e lima moliaga o le taufaaleaga ma le lua moliaga o upu matuiā.
Ua poloa’iina e le Faamasinoga le itu a leoleo ina ia faaliliu i le Gagana faa-Peretania moliaga uma ma taualumaga o mau ma faamatalaga ina ia manino iai loia a le itu a lē o loo molia.
