Ua fautuaina aiga Samoa i Aukilani ina ia usitaia aiaiga mo puipuiga o le koviti ma taofi le agai atu i le malaevaalele e feiloai i sui o laotu aiga o loo malaga mai i galuega faavaitiami.
O le popolega a i latou o loo gafa ma le matafaioi o le vaaia ma mautinoa o loo saogalemu au malaga mai Samoa i lalo o galuega faavaitaimi o le ono aafia ai tagata faigaluega i auga o le faamai pe a fai e tumutumu atu i le malae vaalele aemaise lava o le taimi lenei o le sasao faaafi o le faama’i i Niu Sila.
I se pepa o faamatalaga sainia e le Liason Officer a le Matagaluega o Alamanuia ma Leipa ia Niuafolau Helen Uiese o loo faamanino mai ai vaega e ono tulai mai pe a aafia seisi o le RSE i le Koviti e aofia ai:
(1) taofi ai uma malaga o lo’o fuafua mo RSE mai Samoa, ma e ono a’afia ai le toe fo’i atu o le aufaigaluega i malaga o lo’o tapena atu iai mo le masina fou,
(2) tapunia kamupani o lo’o iai RSE ua a’afia, ma leai ai ma ni galuega,
(3) fa’aletonu ai le feoa’i sa’oloto o tagata o itumalo a Niu Sila lea e lē o pepesi ai le fa’ama’i.
I lea pepa o faamtalga na taua ai foi e Niuafolau “Ia lava pea le onosa’i se’i taunu’u lelei le aumalaga i o latou kamupani, ona talosaga laia pe fa’afefea ona momoli iai lavalava ma isi lava meatotino ma e tatau ona tatou fa’itete, ia aua ne’i soliina aiaiga/tulafono ona a a’afia mai seisi, e ono fa’aletonu uma ai le aumalaga, fa’apea le fa’amoemoe ua leva na tapena iai le Malo a Niu Sila ma Samoa aemaise fo’i nai kamupani”.
