Ua talosagaina nei e leoleo le fesaosoani a Ausetalia i le taumafaiga e saili se tali mo le faalavelave tau taavale (Hit and Run) lea na tulai mai i Vaitele fou i le masina o Aperila.
O lea faalavelave lea na uma ai le ola o se alii talavou 19 tausaga le matua ia Tuuau Maletino lea ua savali ma le 4 masina o tau sailia pea le ave taavale ma le taavale na lavea ai Tuuau.
O le masina na tea nei lea na faailoa mai ai e leoleo se ata pupuu (video) o se taavale lanu paepae masalomia na aafia i le faalavelave ma o lea ua avatu nei i Leoleo a Ausetalia lenei ata pupuu e toe tagatagai ai ma vaai se tulaga e mafai ona manino ai lea ata.
Taua e le Sui Komesina o Leoleo Papalii Monalisa Tia’i Keti o loo galulue va’ava’alua nei Matagaluega o Leoleo a malo e lua ina ia saili vaega uma e mafai ona maua ai se amataga o sailiiliga e ala i lea faalavelave tau taavale.
Ua fautuaina ai foi e le Matagaluega a Leoleo le mamalu o le atunuu ina ia faaititia le feavea’i o tala sesē i luga o upega tafailagi ma le faalavelave i sailiiliga a Leoleo.
