O le fesiligia e le vasega o tusitala ma le aufaasalalau i Samoa o nisi o aiaiga a le soākomiti a le malo o loo feagai ma le tapenaina o lea auaunaga mo le Fono a Malo o le Taupulega o loo loma nei, na matala ai le faitoto’a o le ofisa o le matagaluega o le va i fafo ma fefaataua’iga i le Aso Tofi o lenei vaiaso, i se feiloa’iga sa taloina mai e se ofisa sinia o lea matagaluega a le malo o loo ta’imua i tapenaga o lea fono, ma nisi o tusitala ma le aufaasalalau matutua ma sinia i le galuega.
O le tamaitai o Sonnya Peters mai le matagaluega o le va i fafo a le malo o Niu Sila o loo galue fesoasoani nei i le matagaluega o le va i fafo ma fefaataua’iga a Samoa i le tapenaina o auaunaga mo le faasalalauina o le fono i le masina fou.
O ia lea sa faatinoina se soalaupulega ma faatalatalanoa atugaluga o le autusitala ma le aufaasalalau ina ia maua le femalamalamaa’i i le tapenaga ua taoto nei.
O se faafetai lea a le asosi o tusitala ma le aufaasalalau a Samoa ua amana’ia se faatalauula mo se feiloa’iga.
O lea ua taoto atu i lea ofisa sinia mataupu sa atugalu iai ma o le a faatalatalanoa atili ma le soākomiti a le malo o loo iai le vaaia o lea auaunaga.
O le mae’a o lea feiloa’iga na tuuina mai ai e lea ofisa sinia se pepa o faasalalauga mai le ofisa o Malo o le Taupulega le Commonwealth Secretariat, ua faailoa ai ta’iala uma o le galuega faasalalau mo le faamaninoina o vala sa faanenefu ma atugalu iai.
