E lē o iloa poo le ā le vaalele e malaga ai le Palemia o Niu Sila Christopher Luxon mo lana uluai faigamalaga faavaomalo talu ona tofia e avea ma Palemia.
O le aso a taeao o loo fuafua e malaga ai Luxon i Sini i Ausetalia mo lana faigamalaga e tasi le aso e feiloai ma le Palemia o Ausetalia, Anthony Albanese.
O le vaa 757 a le Defence Force lea na fuafua e faimalaga faatasi ai ma sui o ofisa faasalalau, nisi o lana aufaigaluega faapea sui o le militeli peitai o loo faia galuega faaleleia o le vaa ma e lē o mautinoa pe oo atu a taeao ua lava saunia pe leai.
Ua lipotia o le tuai tele o vaa nei a le militeli le mafuaaga o galuega toe faaleleia o loo faia nei.
Saunoa le Palemia ananafi o loo galulue pea nei iai, ma o le asō e faatoa iloa tonu ai le vaa e malaga ai ma afai ae leai lava se vaa o lona uiga o le a i’u loa ina totogi le pasese ae faimalaga e pei o le faiga o loo feoai ai tagata lautele.
