Ua lapatai mai le Health NZ i tagata e faatatau i le pepesi o le tale vivini ma e ono oo i se tulaga faateteleina i le atunuu atoa.
O Dr Susan Jack o le faatonu aoao o puipuiga tau le soifua mālōlōina ma ua ia faailoa i se faatalanoaga i le leitio faavaomalo a Niu Sila e maualuga le tulaga o iai le ono aafia o Niu Sila mo se pepesi tele o lea faama’i.
O le masina o Setema e 187 tagata na faamauina na aafia ma ua faaluaina ai le aofa’i sa iai i le masina o Aokuso e na o le 75.
Ta’ua e Susan e masani ona vaaia le pepesi o le tale vivini i le ta’i 3-5 tausaga peitai o le koviti ua fesuia’i ai lea tulaga ma ua oo atu i le 6 tausaga e lei toe iai lava se pesiga tele o le tale vivini i le atunuu.
Fai mai o pepe faato’ā fananau mai e aupito i lamatia ma popole iai ma ua una’ia tinā ma’itaga ia faaeteete ma faia tuipuipui.
E faia fua tuipuipui mo tamaiti uma e i lalo ifo o le 18 tausaga le matutua ma tagata matutua ua silia ma le ta’i 65 tausaga o le soifua.
Puna o Faamatalaga: https://www.rnz.co.nz/news/national/530338/whooping-cough-fears-we-re-asking-people-to-take-action-now
