E manatu le tamaitai Sui Komesina, Susuga Papalii Monalisa Tia’i Keti, o le sā o fagumalosi gaosi i Samoa nei ma faataugofie o le mafuaaga lea o le leai o se maliu i le vaitau o aso fiafia atoa ai ma le faaitiitia o faalavelave tutupu.

Saunoa Papalii o le faanaunauga o le Matagaluega ia faatumau pea lea sā auā puipuiga e lē gata mo le saogalemu o lo tatou atunuu i aso faisoo, ae o lea foi o le a alo atu i le taligāmalo ia Oketopa.

Ua mafua ona tuuina mai se manatu o le Matagaluega ona o le tulaga o iai mataupu ma faalavelave sa tulai mai i le vaitau o le Kerisimasi ma le faafeiloai ai o le Tausaga Fou.

Na faailoa manino e Papalii e leai se maliu i lea vaitau i luga o alatetele a le malo.

Na ia taua foʻi sa lē toe vaaia lava foi le tele o onanā i alatetele aemaise o faafitauli i le faatauina o ia avamalosi i faleoloa ma le tele o vaega o le atunuu.

E manatu le Matagaluega o fagumalosi nei sa taugofie ma maua gofie foi o le mafuaaga lea na toatele ai sa agai e faaaogā.

Saunoa Papalii o le taumafa ai e nisi o le atunuu o ia fagumalosi sa vaaia ai le tulagaese o uiga o tagata onanā lea e malamala ane ua leiloa le mea sa tupu.

O le tatalo a le Matagaluega ia faaauau pea lea sā i le lumanai.