E foliga mai ua faaauau pea ona feagai ma lu’itau le vaega o loo finau mo le tuto’atasi o Niu Kaletonia, le pro-independence movement, ina ua lipotia le folafolaga mai nisi o ona sui autū e to’alua o le a aga’i ese mai le kulupu lea i le mae’a o vesiga na tula’i mai i le atunuu i le 6 masina talu ai.

Fai mai le RNZ o le to’alua ua faia le la folafolaga e atoa iai le to’afā o i latou sa faaautū iai lenei kulupu ma ua vaaia le tele o fonotaga ma le autusitala ua sosoo lava le faataunuuina aemaise mai isi foi kulupu e lagolago i le tuto’atasi o Niu Kaletonia.

O le Kanak Socialist National Liberation Front poo le FLNKS o latou ia o loo tuufaatasia le finau lea mo le tuto’atasi o le atunuu mai ia Farani peitai la i le Aso Tofi talu ai, na faailoa ai e le isi vaega lea ua faaigoa o le UPM le Progressist Union in Melanesia lo latou aga’i ese mai ma le faamalu lea a le FLNKS se’ia iai se isi faaaliga.

O le isi la kulupu e faaigoa o le PALIKA e le’i auai foi i le fonotaga na faia ma faailoa foi le aga’i ese mo le taimi nei.

O le 1984 na faatūina ai le FLNKS i le taimi a o vevesi foi le atunuu i lona lava lotoifale ma o loo faaauau pea ona finau mo le tuto’atasi o Niu Kaletonia.

Mo le taimi nei fai mai o loo taumafai pea sui o le aufaitulafono mai Farani e toe faatulaga le faaauauina o talanoaga e faatatau i le lumana’i o le atunuu a o le’i oo atu ia Mati o le tausaga fou.

O ni nai vaiaso o i luma o le a faia ai talanoaga faapolokiki e tāua tele mo Niu Kaletonia pe o le a tuto’atasi pe tumau pea o se vaega o le atunuu o Farani.

Puna o Faamatalaga: https://www.rnz.co.nz/international/pacific-news/534085/new-caledonia-s-pro-independence-movement-struggling-to-maintain-united-front