O le Kolisi o Maluafou na muamua afe iai sui o le aulakapi o le Moana Pasifika mo lana faalauiloa na faamanuiaina ai nisi o le fanau a lea Kolisi maualuga i faailoga o pulou ma pepa ulufale e maimoa ai i le taaloga a le Moana Pasifika ma le Queensland Red i le Aso Faraile o le vaiaso nei.
O se faalauiloa na talisapaia e le Pule ma le vasega o faiaoga auā o se avanoa e lē aumaua, ma o se avanoa foi e faaosofia ai lagona o le fanau e ave le latou lagolago i le atina’eina o le taaloga lakapi.
O se tasi o tama o le ‘au le susuga Tomasi Alosio sa taalo foi i le aulakapi fitu a le Manu Samoa i ni tausaga ua tuanai, o ia lea sa taulamua i le faalauiloa a le Moana Pasifika i le Kolisi o Maluafou.
Faaalia e Tomasi e tatau ona manumalo i le taaloga ma le Queensland Red, ona ua lava tapena mai le taaloga ma le Crusaders e ui e lei maua lava se manumalo talu ona amata le taamilosaga o le Super Rugby.
Le susuga Tomasi Alosio o se tasi o tama o le aulakapi o le Moana Pasifika, lea na taunuu i laufanua o le Manu Samoa i le Aso Sa ua mavae atu nei.
O le maota gasegase o Tupua Tamasese na oo foi iai le Moana Pasifika mo lana faalauiloa i le Aso Lua.
